الجلاش باللحمه المفرومه وحاسبي لتاكلي صوابعك وراه

الجلاش باللحمه المفرومه وحاسبي لتاكلي صوابعك وراه

1- 3/4 كيلو جلاش
2- بصلتين متوسطين الحجم ومبشورين
3- 400 جرام لحمه مفرومه
4- فلفله خضرا مقطعه مكعبات
5-حبه طماطم كبيره مقطعه مكعبات
6- اربع ملاعق زيتون اسمر شرائح
7-شويه جبنه موتزاريلا مش كتير يعني
8- بيضتين
9-تلت اربع كوب لبن
10-وطبعا الزيت عباد شمس او ذره براحتك
11- حوالي اربع حبات مشروم (عيش الغراب) متقطعين
نبدأ بأه

سخني الزيت في حله متوسطه وحطي عليه البصل المبشور عندك ولما يتحمر البصل حطي اللحمه المفرومه وقلبي كويس غطي عاللحمه دلوقتي وفي طاسه تانيه حطي معلقه زيت واحده بس وفوق الزيت حطي المشروم ( عيش الغراب) وسيبيه في الزيت لوحده دقيقه واحده ثم ضيفي الفلفل الاخضر وبعديه الطماطم وبعد كده الزيتون الاسود غطي عليهم لمده دقيقتين مع التقليب وسيبيهم يتكمرو مع بعض دقيقتين بس - بعد كده تكون اللحمه استوت تتبليها طبعا بالملح والفلفل وتضيفي عليها المشروم والفلفل الاخضر والطماطم والزيتون وفي اللحظه دي تضيفي الجبنه الموتزاريل بعد ما تطفي النار علي كل المكونات تمام كده - نيجي لللبن والبيض الاتنين مع بعض في الخلاط وعليهم ذره ملح وذره فلفل اسمر - في صينيه بأه متوسطه افردي نص كميه الجلاش وطبعا قبل ما تحطيه تدهني الصينيه بشويه زيت فوق طبقه الجلاش الاولي حطي الحشو وبعدين طبقه الجلاش التانيه ومتنسيش تقطعي الصينيه اعمليه بأه علي شكل مربعات مثلثات زي ما تحبي وبعد التقطيع تحطي فوق الصينيه اللبن المخلوط مع البيض - دخلي الصينيه في فرن متوسط الحراره وبس كده خلصت وبالهنا والشفا